புதினா சட்னி & புதினா சப்பாத்தி ரோல்

எப்போ பாத்தாலும் இட்லி - சட்னி, தோசை - சட்னி சாபிட்டு போர் அடிக்குது. ஒரு சேஞ்ச்-க்கு புதினா சட்னி வெச்சு சப்பாத்தி ரோல்  பண்ணலாம்னு ட்ரை செஞ்சேன். என் கணவருக்கும் இந்த காம்பினேசன் பிடித்திருந்தது (நம்மாளுக்கு சப்பாத்தின்னு பேப்பர்ல எழுதி குடுத்தா கூட சாபிட்டுருவாரு......... ஆனாலும் என் கணவர் ரொம்ப நல்லவருங்க.... அவ்வ்வ்வ்)

புதினா சட்னி:

 

புதுசா நான் இத உங்களுக்கு கற்று கொடுக்கணும்னு அவசியம் இல்ல, நிறைய பேர் இந்த ரெசிபி பதிவு செய்து இருகாங்க (அப்பாடா  தப்பிச்சோம்டா  சாமி-ன்னு நீங்க சொல்றது எனக்கு கேக்குது). ஆனாலும் என் செய்முறையை சுருக்கமா சொல்லலாம்னு நினைக்கிறன் (கொசு தொல்ல தாங்க முடியலப்பா.......)

 

தேவையான பொருட்கள்:

1. உளுத்தம் பருப்பு - 4  ஸ்பூன்
2. கடலை பருப்பு - 2  ஸ்பூன்
3. புதினா ஒரு கட்டு (இலைகளை மட்டும் ஆய்ந்து, தண்ணீரில் கழுவி  சுத்தம் செய்து கொள்ளவும்)
4. பச்சை மிளகாய் - 5
5. புளி - சின்ன நெல்லிக்காய் அளவு
6. பூண்டு - 4  பல்
7. இஞ்சி - சிறிய துண்டு
8. தேங்காய் துருவல் - 1 /4 கப்
9. உப்பு
10. எண்ணெய் - 2  ஸ்பூன்
11. சீனி -அரை ஸ்பூன்

 செய்முறை:

• கடாயில் 2  ஸ்பூன் எண்ணெய் விட்டு உளுத்தம் பருப்பு, கடலை பருப்பு இரண்டையும் பொன்னிறமாக  வறுத்து எடுத்து வைத்து கொள்ளுங்கள்.
• அதே கடாயில் உப்பு, சீனி, தேங்காய் துருவலை தவிர அனைத்து பொருட்களையும் சேர்த்து நன்கு வதக்கி கொள்ளுங்கள்.
• வதக்கிய புதினா ஆறியதும், தேங்காய் துருவல், உப்பு, வருத்த பருப்புகள் சேர்த்து மையாக அரைத்து கொள்ளுங்கள்.
• கடாயில் 2 ஸ்பூன் எண்ணெய் விட்டு அரைத்த சட்னி-யை அரை ஸ்பூன் சீனி சேர்த்து 2 நிமிடம் வதக்குங்கள். சீனி சேர்ப்பதால் சட்னி நிறம் மாறாமல் இருக்கும், அரைத்த பின் வதக்குவதால் 3 -4  நாள் பிரிட்ஜில் ஸ்டாக் வைத்து கொள்ளலாம் + சப்பாத்தியில் தடவும் போது சப்பாத்தி ரோல் நீர்த்து (ஒரு மாதிரி நீர் கோர்த்து அந்த இடத்தை சுற்றி கொஞ்சம் லூசாக இருக்கும்)  போகாது.

புதினா சப்பாத்தி ரோல்:

 

தேவையான பொருட்கள்:

புதினா சட்னி

பொடியாக நறுக்கிய வெங்காயம்

துருவிய காரட்

லெமன் ஜூஸ்

 

ரோல் செய்ய:

புதினா சட்னியை சப்பாத்தி நடுவில் தடவி, நறுக்கிய வெங்காயம், துருவிய காரட் ஸ்டப் செய்து, அரை ஸ்பூன் லெமன் ஜூஸ் தெளித்து ரோல் செய்யவும். சூடாக பரிமாறவும்.